logo

Saint Catherine Hike

 البداية تليفون من عمر سمرة

الو ….. اهلا اهلا عمر سمرة ازيك ؟

اهلا عمرالفردي   اخبارك ايه

عمر سمرة : باقولك يا فردي  عاوزينك تطلع معانا جبل كاترين اعلي قمة و اعلي نقطة في مصر  في مبادرة المصري اليوم اكتشف مصر

انا:  تمام ده شرف لي اكون مشارك معاك في حاجة زي كده يا سمرة  مع السلامة

همممممم ……!!!

تسلق اعلي قمة في مصر ؟؟ استرجعت زكرياتي  ان اخر مرة تسلقت جبل كان جبل موسي في كاترين سنة 2000 مع صديقي العزيز اسماعيل فاضل  و كنت مش متذكر كويس ليه انا ما تسلقتش جبال من سنة 2000 !!!

المهم في اليوم المحدد  وصلت  لشرم الشيخ بالطيارة و انا مابحبش اسافر بالطيران افضل بعربية او بالموتوسيك

كان نفسي طبعا اشارك بالموتوسيكل بس للاسف ممنوع دخول و سير الموتوسيكلات سيناء لاسباب امنيه يارب  ينتهي هذا المنع قريبا ….

كان في استقبالي في مطار شرم صديقي استاذ علاء من مصر للسياحة و استاذ  يحيي و هو من اقدم الغواصين في شرم الشيخ و اشكرهم علي حسن الاستقبال

330251_IMG-20151224-WA0006

ومن شرم الي سانت كاترين كان منتظرني محمد ابن الشيخ موسي صاحب المخيم اللي حتكون اقامتنا فيه

و الشيخ موسي صديقي عزيز علي من سنين و محمد ابنه مثال للشاب البدوي الجميل اللي بيحاول يطور نفسه مثلا بياخد كورس تصوير و انه يكون دليل متميز في الجبال

الفريق المشارك في مبادرة المصري اليوم مع شركة وايلد جوانابا و عمر سمرة  وصل بحمد الله الي كاترين

682057_IMG-20151226-WA0020

و طبعا عمر سمرة ارسل لي تفاصيل الرحلة و الملابس اللي استخدمها في تسلق الجبل

معنديش ملابس  مناسبة و لكن استخدمت بعض الملابس اللي كنت بالبسها في رحلتي للقطب الشمالي بالموتوسيكل

عمر سمرة كان مؤكد علي نقطة البعد تماما عن الملابس القطنية لانك من مجهود التسلق بتعرق و الملابس القطنية بتمتص العرق و تبقي مبتلة  و مع البرد الشديد بتبقي كانك لابس لوح من التلج علي جسمك

بالفعل لبست تي شيرت نص كم  بيسمي ( ثيرمال ) و هو زي مادة الليكرا, و ميزته انه جسمك لما بيعرق بيمتص العرق و بيطرده خارج جسمك  يعني مابتبقاش مبلول من جوه ( معلوماتي هنا ضعيفة  لو حد عاوز معلومات وافية يسال عمر سمرة او اي متسلقي الجبال ) انا بستخم التي شيرت ده لانه بيدفيني علي الموتوسيكل

و فوق التي شيرت كنت لابس واحد تاني زيه بكم طويل و بلوفر من مادة البولار و جاكيت من مادة البولار و جاكيت تاني  مخصص لمقاومة الرياح  و كنت لابس كالسون( بنطلون داخلي ) صوف و انا في النرويج صديق اهداني له لاني كنت متلج علي الموتوسيكل

و اخدت شراب صوف من عمر سمره  و كنت لابس حذاء انا شاريه علشان لما اطلع رحلات صيد في البر و بالصدفة لقيته انه مناسب جدا لتسلق الجبال و قفازات  لليد

انا باكتب كل التفاصيل علشان لو في اي واحد عاوز يزور كاترين و يتسلق الجبال يبقي عنده معلومات الي حد ما عن الملابس المناسبة لانها بتسهل الي حد كبير الرحلة

ده لينك لقائمة بالملابس المناسبة لدرجات الرحارة المنخفضة وممكن تبحث علي النت و تعرف تفاصيل اكثر

http://sectionhiker.com/winter-day-hiking-gear-list/

يوم الجمعة 25-12 الساعة 6 صباحا بدأنا التسلق و كان كل واحد معاه شنطة ظهر فيها  يعض المستلزمات

انا كان معايا كاميرا صغيرة و زجاجة مياه و برتقالة و علبة تونة و قطعة حلاوة طحينية و واحد عصير صغير و خيارة

و كان فيه ناس من الفريق شايلين  معاهم ساندويتشات مربي و جبنة لكل الفريق

الجو كان برد درجة الحرارة 7 مئوية  و توكلنا علي الله

تعليمات عمر سمرة ان كل ساعة نتوقف 5 دقايق فقط  للراحة و بعد كده نكمل تسلق

علشان نقدر نصعد اعلي قمة في مصر و نرجع قبل حلول الظلام

اول ساعتين مشي كانوا سهلين الي حد ما بعد كده بدأ العذاب بالنسبة لي

التسلق عبارة عن مشي لاعلي في مدق  و ساعات تقابل صخور لازم تمشي عليها علشان كده لازم حذاء جيد و لا حاتتعب خالص

ابتدي فرق السرعات و اللياقة البدنية يظهر   و بدات افتكر انا ليه ما طلعتش جبال في اخر 15 سنة

من ساعة حادث الموتوسيكل  اللي تعرضت له في سنة 2010 و رجلي الاتنين كانوا مكسرين و فيهم مسامير بجانب ان ركبتي مقطوع فيها اربطة و انا مش عاوز اعمل عمليه فيها  و خصوصا اني مش مواظب علي الرياضة في اخر خمس سنين يعني اللياقة البدنية تعباااااانة

حسيت اني عامل زي العربية الفيات ال 126 و موتورها مفوت ههههههه

احساس التعب هاجمني بشدة و بعنف

يا نهااااار اسود ايه ده انا مش قادر حتي اخد نفسي ههههههههههههه

اعتقد ان سرعتي كانت 2 كيلو في الساعة علي اقصي تقدير

بقيت اقول لنفسي طيب خلاص كفاية كده اركن هنا في اي مكان و شوف لك مكان مداري من الهوا  و اقعد الناس تطلع الجبل و تنزل و تنزل انت الكام كيلو دول معاهم

يادي الكسوف يعني ما اكملش ؟؟

طيب ادوس علي نفسي شوية كمان

علي الساعة 12 ظهرا كنت خلاص  بدات اني افقد تركيز لدرجة اني مش شايف قدامي خالص و ان لما حد بيكلمني مش سامعه و لو سامعه مش قادر اجاوبه

في ناس بدات تركن و ما تكملش و ترجع  و انا كنت عاوز اعمل كده بس العند و الرغبة اني اوصل لاعلي قمة جبل  في مصر طانت بتعطيني دافع الي حد ما

ييجي هنا دور فريق العمل

بصراحة فريق وايلد جوانابانا  محترف جدا  و كان كل واحد تعبان بتلاقي جاله واحد من الفريق و يبدا يمشي جنبه و يشجعه و يتكلم معاه في مواضيع كتيرة و كانت طريقه فعالة جدا انك ما بتحسش بالتعب او بتنسي التعب

برافو عمر سمرة فريقك محترف جدا و روحه حلوة  و فاهمين همه بيعملوا ايه

انا في لحظات كنت احس بالانهيار  و باحس اني مش قادر اصلب طولي مش امشي او اتسلق و المشكلة اني لما باقف علشان استريح باتعب اكتر و في لحظات تحس بالبرد الشديد

و كان دايما اعضاء فريق وايلد جوانابا يقولي حاول تهدي سرعتك و تقصر خطوتك  بس كمل مشي

تقريبا بعد كده سرعتي بقت زي سرعة السلحفة او ابطأ كمان,  بالكتير سرعة نصف كيلو في الساعة

slow as tirtle

استمتعت جدا لما كان معايا احمد هيمن و هو مصور محترف و كان لابس شال علي راسه ( بلغة بدو اولاد علي  صماده ) و كان لابس جلابية و شكله عامل زي قوات

البشمرجة او  من طاجيكستان  وكان عمال يتكلم معايا و يحفزني اني اكمل )  الف الف شكر يا هيمن علي تشجيعك )

عمل معايا نفس الحاجة بالتناوب عهود و لينا  الف شكر ليكم بجد روح الفريق عندكم هي اللي خلتني اكمل المشوار المرهق جدا جدا

رفيقي في الصعود كان محمد صافي او صفي الدين  و هو صديق لي من العجمي و هو مذيع في الراديو و كنت باحب اسمع صوتهجدا  و هو بيتكلم في جهاز اللاسلكي

صافي بجد سبع صنايع طبيب و مذيع و دي جي و متسلق جبال و صياد سمك و بيمارس العاب مائية زي الكايت سيرفنج

كل خمس دقايق باكتشف فيه حاجة ايجابية

واستمتعت جدا بصحبته

قبل الوصول الي القمة بساعتين

لقيت واحد مش متذكر اسمه من الجروب معانا و تعبان خالص و قاعد مريح . سالته ايه الاخبار ؟ رد قالي لا انا تعبت جدا و مش مكمل . كانت قمة الجبل ظهرت و ممكن تشوفها  . قلت له بص فات الكتير و مابقاش فاضل غير القليل  القمة اهي و ولو رجعت حتزعل من نفسك انك ما كملتش و سبته و كملت مشي

انا اصلا بكلمه  و انا ميت من التعب مش قادر امشي

بعد نصف ساعة تقريبا  لقيته كمل و حصلني و قالي انت السبب اني خلتني اكمل  . فرحت قوي من نفسي اني اديته طاقة ايجابية او كنت سبب انه يكمل , المفاجاة انه وصل كمان قبلي هههههههههه

زميلي في الكفاح كان شادي و هو عنده اصابه في رجله كانت تعباه قوي و كنا بنشجع بعض  و شادي مغني و بيلعب مزيكا

بصراحة شادي انا كنت متوقع انه مش حيكمل و لكن فاجئني اخر 3 كيلو جاتله طاقه منين معرفش و شد ووصل فوق و كانت لينا علي طول بتشجعه

اخر كيلو كان صعب جدا جدا تقريبا كنت باتسلق 50  متر و اقف لاني مش قادر و الحمد لله اخيرا و صلت الي القمة اعلي قمة جبل في مصر 2600 متر فوق سطح البحر و اول ما وصلت كنت فرحان جدا جدا و الغريب ان التعب راح بنسبة كبيرة

تصورت كام صورة فوق  و كنت قبل ما ابدأ التسلق مشغل ابليكاشين في التليفون السامسونج بيحسب  مسافة السير و عدد السعرات الحرارية  و بصيت عليه لقيت اني  تسلقت 12 كيلو  من الساعة 6 و نصف صباحا و حتي الساعة اتنين و نصف عصرا يعني8 ساعات كتواصلة من العذاب  و لسه رحلة العودة

بعد كده بدأت رحلة النزول و كان لازم ننزل بسرعة قبل حلول الظلام

معظم الوقت كان معايا خالد السنوسي و كان علي طول بيشجعني و شوية كان يشيلني و يمشي بي من التعب . الف شكر يا سنوسي يا فنان

و كنت في رحلة النزول معايا لينا و دينا و شادي  كمان

الحمد لله النزول اسهل نسبيا بس بيحمل علي الركبة اكتر و كانت ركبتي واجعاني جدا جدا بسبب حادثة الموتوسيكل

و صلنا اسفل القمة  علي الساعة 7 و نصف مساءا و هنا كانت فايدة مصباح الاضاءة اللي عمر سمرة كان منبه ان كل واحد يجيبه لانه في الظلمة ممكن جدا تتعثر في صخرة  و تصاب  في الكاحل او في رجليك عاما  و يبقي المشي بعد كده عذااااااب

بعد ما وصلنا لمدينة كاترين و انا اول ما شفت الاسفلت اتشاهدت و قعدت علي الاسفلت اشكر ربنا و افكر اني لازم ابدا اعمل رياضة  لاني عرفت ان لياقتي البدينة تحت الصفر

 

 

Screenshot_2015-12-25-21-13-42_resized_1

صورة توضح كام خطوة و المسافة بالكيلو متر صعودا و نزولا 

و صلت لمخيم الشيخ موسي بالعافية و من كتر التعب و البرد   رميت نفسي جنب نار المخيم  و مع اني كنت جعان ما اقدرتش حتي اني اتعشي . شربت شوربة عدس و كنت حاضن السلطانية بايديا الاتنين كأني لقيت كنز من الذهب بسبب البرد القارص

 … يااااه يا عبد الصمد ده الدفا نعمة بجد

بجد المبادرة من المصري اليومممتازة و سعيد جدا اني موجود مع الصحبة الجميلة دي و كلهم ناس متميزين و حاجة تشرف

و تنظيم عمر سمرة و شركه وايلدجوانبانا  ممتاز و محترف جدا

و انا اسف جدا لو طولت عليكم بس حبيت اني اشارككم في معظم التفاصيل

و بجد لازم كلكم تزوروا سانت كاترين و تسمتعوا بالطبيعة الجميلة هناك و الراحة النفسية  فيها

معلومات في السريع عن سانت كاترين 

 تعد مدينة سانت كاترين أكثر مدن سيناء خصوصية وتميزاً .. فهى أعلى الأماكن المأهولة فى سيناء حيث تقع على هضبة ترتفع 1600 متر فوق سطح البحر .. وتحيط بها مجموعة جبال هى الأعلى فى سيناء بل وفى مصر كلها .. وأعلاها قمة جبل كاترين وجبل موسى وجبل الصفصافة وغيرها .وتقع سانت كاترين فى قلب جنوب سيناء على بعد 300 كم من قناة السويس . وتبلغ مساحتها 5130 كم مربع. وتشتهر المدينة بالسياحة الدينية وسياحة السفارى وتسلق الجبال. ويوجد بها دير سانت كاترين وجبل موسى ومقام النبى هارون وغيرها من الاثار الدينية. كما يوجد بها العديد من المشروعات السياحية الكبرى. وتعتبر أكبر محمية طبيعية فى جمهورية مصر العربية من حيث المساحة

جبل موسي

يعتبر من أكثر الجبال الموجودة فى جنوب سيناء شهرة و يحب كل زائر إلى دير سانت كاترين أن يعتلى قمة هذا الجبل الذى يعلو نحو 2250 متر فوق سطح البحر و قد أطلق عليه هذا الأسم نسبة إلى سيدنا موسى عليه السلام  لأنه كان يعتلى هذا الجبل لكى يناجى ربه لمدة أربعين يوما ليتسلم الرسالة التى سلمها لبنى قومه الذين كانو ينتظرون فى وادى الراحة و يقال أن هذا الجبل كانت تخرج منه رعود و يهتز بشدة و يستطيع المرء حين  يصعد إلى قمته أن يشاهد أبدع منظر تراه العين و بخاصة فى الصباح الباكر و الشمس ترسل أشعتها على الجبال المتراكمة فوق بعضها البعض على مدى النظر  و قد شيدت على قمته كنيسة صغيرة و إلى جوارها جامع صغير فكان ذلك أبلغ تعبير عن الوحدة الوطنية التى تربط بين قطبى الأمة

 جبل كاترين

جبل كاترين أو جبل القديسة كاترينا أو جبل طور سيناء يقع في محافظة جنوب سيناء في مصر، ويعتبر من أعلى الجبال في سيناء ويبلغ ارتفاعه 2.629 م فوق سطح البحر، تتساقط على الجبل الثلوج في فصل الشتاء مثل باقى جبال منطقة جنوب سيناء

وسمي الجبل بهذا الاسم تخليدا للقديسة كاترين في المسيحية من الأسكندرية وهي من أهم القديسات في الغرب ولها دور كبير في انتشار المسيحية وماتت فداء لذلك ، وتقول القصة ” أن رهبان دير وجدوا جسدها أعلى الجبل حيث تم إعدامها في الأسكندرية ومن ثم اختفي جسدها من الأسكندرية وأن الملائكة قامت بوضع جسدها أعلى قمة الجبل “

أعلى الجبل يوجد مصلى خاص بها في المكان الذي وجد فيه جسدها

يعتبر هذا الجبل المبارك من أفضل جبال الأرض عند الله ،وقد تم ذكره في القران كما تم ذكر سيناء

قال الله تعالي  (والتين والزيتون‏ .‏ وطور سينين ‏.‏ وهذا البلد الأمين)  سورة التين

دير سانت كاترين

يقع الدير أسفل جبل سيناء ، فى منطقة جبلية وعرة المسالك وللدير سور عظيم يحيط بعدة أبنية داخلية بعضها فوق بعض تصل أحياناً إلى أربعة طوابق تخترقها ممرات ودهاليز معوجة . وبناء الدير يشبه حصون القرون الوسطى ، وسوره مشيد بأحجار الجرانيت. ويعود بناء الدير إلى القرن الرابع الميلادى عندما أمر ببنائه الإمبراطورة هيلانه والدة الإمبراطور قسطنطين سنة 432م ثم أكمل في عهد الإمبراطور جوستينيان سنة 545م ليكون معقلاً لرهبان سيناء وقد سمي في العصور التالية باسم دير القديسة كاترين أحد شهداء الإسكندرية لرؤية رآها أحد الرهبان في منامه بأنها نقلت إلى هذا الموضع فتم نقل رفاتها  بناءً على ذلك وأطلق اسمها على الدير وعلى المنطقة كلها

وأهم مبانى الدير هى : الكنيسة الكبرى ، وكنيسة العليقة ، والجامع ، والمكتبة بالإضافة إلى قلايا الرهبان ومعصرة وطاحونتين ومخازن حبوب ومؤن وآبار للمياه

 رحلة الي سانت كاترين تتكلف كام ؟

عاوز تطلع  رحلة مش غالية و عاوز تلم الدور يبقي تاخد اتوبيس من محطة الترجمان  في القاهرة  يوميا و تكلفته 65 جنيه

و لو انت من محافظة تانية  خد اي مواصلة للقاهرة و تاخد الاوتوبيس

حجرة نوم عند الشيخ موسي ممكن تبدا معاك من  25 جنيه  الي 150  جنيه و الفطار ب 25 جنيه و العشاء ب 50 جنيه  ارز و فراخ و خضار و شوربة و سلطة و مشروب

العدد المثالي للسفر في رأيي هو 4 او 5  اصدقاء  تعالي نحسبها لو مجموعة من 5 افراد

الحساب للفرد

مواصلات رايح جاي من القاهرة

130 جنيه

نوم اول ليلة  25 جنيه

عشاء اول ليلة 50 جنيه

تكلفة دليل بدوي محترف لصعود جبل موسي 280 جنيه ( تقسم علي خمس افراد ) قول 60 جنيه للفرد

فطار تاني يوم 25 جنيه

مشتريات لزوم رحلة صعود الجبل ( علية تونة و خبز و عصير و مياه و بسكوت و شيكولاتة)  20 جنيه

مبيت تاني ليلة و عشاء و افطار 100 جنيه

100 جنيه نثريات و شراء اعشاب او هدية

يبقي المجموع الكلي 510 جنيه لرحلة 3 ايام ليلتين لو فيه غلط في الحساب سامحوني اخوكم بليد جدا في الحسابات

كده يبقي انت عملت رحلة زي الفل و اتفسحت و شفت مكان جميل في مصر ب500 جنيه. لو رحت مرتين كافيه او مطعم شيك في القاهرة او الاسكندرية حتصرفهم

الشيخ موسي عامل نظام جميل جدا و هو تناوب الادوار لدليل الجبال يعني في دور علشان كل دليل يشتغل و يكسب فلوس و اهل كاترين ناس طيبين جدا و عندهم صبر و قوة زي قوة الجبال

ده موقع الشيخ موسي و فيه كل التفاصيل عن زيارة لمدينة سانت كاترين

http://www.sheikmousa.com/index.html

لينك لفيديو الرحلة

 https://www.facebook.com/wildguanabana/videos/10153514294212830/

  • Share